Saga skólans

Saga skólans


Mynd tekin 17. júní 1966Í upphafi stóð Ölfushreppur einn að skólahaldi, en eftir að Hveragerði varð sjálfstætt sveitarfélag hafa þessi tvö sveitarfélög staðið sameiginlega að rekstrinum. Í dag kemur Ölfushreppur að rekstri tveggja grunnskóla, í Hveragerði og í Þorlákshöfn. Nemendur úr dreifbýli Ölfushrepps sækja skóla í Hveragerði.

Áður en Hveragerði varð sjálfstætt sveitarfélag 1946 var skóli starfræktur að Kröggólfsstöðum í Ölfusi. Hann tók til starfa haustið 1881 og var þeim börnum sem ekki gátu gengið daglega til skólans komið fyrir á næstu bæjum. Skólinn að Kröggólfsstöðum var starfræktur í ellefu ár. Þrátt fyrir að skólinn leggðist niður vorið 1892 var barnakennslu haldið áfram á árunum 1892-1897.  Fengnir voru farkennarar til að annast þá kennslu. Með setningu fræðslulaganna árið1907 hófst skólastarf á vegum ríkisins. Þá var skólahús reist á Kotströnd og annað á Hjalla. Skólinn á Kotströnd fluttist fljótlega að Sandhóli og þegar Þinghús (elsti hluti gamla Hótels Hveragerðis var byggt í Hveragerði árið 1930, fluttist skólahald þangað

Árið 1937 var stofnaður heimavistarskóli í Hveragerði þegar keypt var hús er áður hafði verið barnaheimili Oddfellow-reglunnar.

Árið 1943 var keyptur skólabíll og síðan þá hefur skólinn verið heimangönguskóli.

Haustið 1947 var elsti hluti núverandi aðalbyggingar („gamla gráa skólahús“) tekinn í notkun. 

Haustið 1972 var skólanum skipt í tvær aðskildar stofnanir, Barnaskólann og Gagnfræðaskólann í Hveragerði og urðu skólastjórar þá tveir.

Þegar Gagnfræðaskólinn var stofnaður haustið 1965 var efri hæð sundlaugarinnar í Laugaskarði tekin á leigu fyrir þrjá bekki Gagnfræðaskólans. Fyrsti bekkur var í barnaskólahúsinu. Í janúar 1973 fluttust allir bekkir Gagnfræðaskólans í leiguhúsnæði að Breiðumörk2.

 

Árið 1988 var viðbygging við gamla barnaskólann tekin í notkun.  Skólinn var sameinaður á ný í eina stofnun. Skólastjóri varð einn og honum til aðstoðar yfirkennari, síðar aðstoðarskólastjóri. Með grunnskólalögunum frá 1995 urðu 6 ára börn skólaskyld.  Skólinn var tvísetinn að hluta til ársins 2001 þegar sex nýjar kennslustofur voru teknar í notkun. Þrátt fyrir þessa viðbót er enn þörf á nýbyggingum. Í dag er kennt í tveimur færanlegum kennslustofum. Enn er mikil og brýn  þörf á kennsluaðstöðu til list- og verkgreina og stendur það skólastarfi í dag fyrir þrifum. Í október 2007 verður tekið í notkun endurgert húsnæði (,,gamla kaupfélagshús”) við Breiðumörk fyrir myndmennt, smíði og málmsmíði. Búið er að setja saman nefnd sem er að fara yfir þörf fyrir viðbótarhúsnæði grunnskólans því það liggur fyrir að töluverð fólksfjölgun mun verða á næstu árum í bæjarfélaginu.

Frá árinu 2000hefur sérdeild verið starfrækt við skólann.

Mötuneyti hefur verið starfrækt við skólann frá upphafi, fyrst fyrir starfsmenn og nemendur úr ÖlfusiFrá árinu 1989 hefur öllum nemendum staðið til boða að nýta mötuneyti.Skólasel (heilsdagsskóli) hefur verið starfrækt samfleytt frá árinu 2000.

Grunnskólinn í Hveragerði er mjög vel staðsettur með náttúruperlur allt um kring. Varmá er í túnfætinum en þar er að finna heitar uppsprettur. Sundlaugin í Laugaskarði steinsnar frá, að ógleymdu náttúruundri sem á fáa sína líka í heiminum, en það er hverasvæðið við Hveramörk.  Mjög fallegar gönguleiðir eru hér og óþrjótandi möguleikar til útivistar- og útikennslu.

Mynd tekin 17. júní 1966

 Saminn var skólasöngur fyrir Barnaskólann í Hveragerði.

Blessun hvíli ár og öld

yfir þessum skóla.

Ljúflingsaugu, ljósafjöld

ljómi þar um vetrarkvöld,

andi ástúð jóla.

Blessað, blessað,

blessað líf

blómstri í þessum skóla.

Höf. Jóhannes úr Kötlum.

 

 

Go to top