Skólasafnið hlýtur styrk

Skólasafn Grunnskólans í Hveragerði var eitt af 40 skólasöfnum sem fékk í gær afthentan styrk úr Skólasafnasjóði. Styrkurinn er hluti af verkefninu Ávísun á lestur sem Félag Íslenskra bókaútgefenda stendur fyrir. Arion banki lagði síðan eina milljón króna til verkefnisins og var þeim peningum deilt út í gær. Tilgangur sjóðsins er fyrst og fremst að vekja athygli á mikilvægi skólabókasafna með þessum táknræna stuðningi, en að sjálfsögðu munar um hverja krónu til kaupa á bókum á skólasöfnin. Við þökkum kærlega fyrir okkur.

Svo minnum við á Ávísun um lestur, sem send var í öll hús. Því fleiri ávísanir sem eru notaðar, því stærri verður Skólasafnasjóðurinn og fleiri njóta góðs af. Munið að merkja ávísunina Grunnskólanum í Hveragerði!

Sögustund

Í dag kom Anna Margrét Stefánsdóttir í heimsókn í bekkina á yngsta stigi til að lesa sögu. Hún var klædd í sérlega litríkan sögukjól, með sögusjal á herðum og las gömul og góð ævintýri fyrir börnin. Á myndinni sem fylgir fréttinni er hún að lesa um Sefslána fyrir 3. bekk. Anna Margrét er afar góður upplesari og börnin hlustuðu af athygli. Það er alltaf ánægjulegt að fá góða gesti í heimsókn, það lífgar uppá skólastarfið.

Útistofan

Í gær fór 1. bekkur í gönguferð upp í útistofuna  í Hamrinum. Þar höfðu börnin mælt sér mót við skólahópana á leikskólum bæjarins og varð fagnaðarfundur þegar hóparnir hittust. Margir klifruðu góðan spöl uppi skóginn en aðrir héldu sig nærri skýlinu. Í útistofunni er margt að skoða og þar leiðist engum. Þegar leið á tímann var rölt niður á íþróttavöllinn og farið í köttur og mús. Ferðin er liður í samstarfi skólanna en næst í þeirri dagskrá er vorskólinn sem verður dagana 8. 9. og 10. maí.

Á myndinni má sjá nemendur í 1. bekk og skólahópi stikla á drekanum í útistofunni.

Umhverfisverðlaun Hveragerðisbæjar

Grunnskólinn í Hveragerði hlaut í gær umhverfisverðlaun Hveragerðisbæjar. Þau voru afhent við hátíðlega athöfn í Landbúnaðarháskólanum að Reykjum í Ölfusi. Verðlaunin afhenti Herra Ólafur Ragnar Grímsson forseti Íslands. Grunnskólinn fékk afhentan Grænfánann þann 1. desember síðastliðinn.

 

Á myndinni eru: Ari Eggertsson, Garðar R. Árnason, Guðjón Sigurðsson skólastjóri, Ólafur Ragnar Grímsson, forseti og Unnur Þormóðsdóttir, formaður bæjarráðs.